出发一一 《乖乖隆地咚,AI叫阿拉去喫饭》(原创)第781期 （沪语）
打开微信窗口，看到了侬，阿拉相视一笑。原来，好朋友、新伙伴总会勒勒此地碰头，嘎三胡开始喽……
2026年3月22日上半日，同学、朋友们约好勒勒陆家嘴2号线地铁站等候。阿拉事先讲好去国际会议中心东方滨江大酒店去喫自助午餐。地铁站里人头攒动，微信群里消息跳不停，小群里开始闹猛了，伟明同学已经到了集合地点。吾一看手表，喔嚯！伟明同学第一名哦。
阿下来，靓妹搭小敏子夫妇也到了。吾搭仔宅宅（爱人）标准辰光（10点钟）到达。宅宅还勒勒悄悄搭吾讲：“侬看哪能啊，吾算辰光老具伐啦？讲勿会迟到就是勿会迟到。阿拉是从14号线下车后往两号线走过来的，照样辰光算得准。”
吾回复正洋洋得意的宅宅：“好唻，侬迭戈闲话要是被群主小敏子听到了，肯定要（佯装）板起面孔来上一句‘勿好早点出来啊’？”（捂嘴笑）
想想也是，迭戈就是阿拉上海人碰头的味道呀：闹猛、贴心、还有一眼眼欢喜斗嘴的小乐趣。（笑）
宅宅还想讲啥，吾马上把手指头摆勒嘴唇高头，对宅宅做个“嘘”个手势：“大家都到了，阿拉两家头就算晚到哦。下趟出来多算刻把钟！”
一走出地铁陆家嘴站个一刹那，阳光一下子扑过来，眼睛还没来得及眯起来，金茂、环球、上海中心三件套已经齐刷刷立勒面前了（真个像仪仗队），伊拉弗讲闲话，但气势摆得足足个。
高楼排好队欢迎阿拉，阿拉哪能好弗领情呢？吾搭小敏子、靓妹左拍右拍……背景里三件套笔笔直，像勒背后悄悄讲：“欢迎光临陆家嘴，欢迎来喫饭，欢迎来嘎三胡。”（笑）
阿拉一路浪厢拍拍照片，特别是看到了东方明珠是一定要拍的，吾蹲勒地浪厢，一边拍一边指挥：“靓妹侬手再抬高一眼！小敏子手指头并拢！覅动！”
小敏子搭靓妹都把手高高举起，勒勒取景框里看，正好“搭牢”东方明珠第一个球。“咔嚓“一声，画面定格，阳光透过手指缝隙，球体反射出碎碎个光芒，像勒伊拉掌心开出一朵透明个花。哈哈哈……开心得唻。
陆家嘴人行天桥浪厢换了新品种花朵（粉红色），漂亮极了，花瓣层层叠叠。靓妹第一个俯下去闻：“呒啥香味道，但颜色看了让人心里软塌塌。”
小敏子用手轻轻托起一朵：“侬看呀，迭个花瓣像弗像小姑娘裙子浪个荷叶边？一片包一片，数也数勿清爽。”
吾看到国际会议中心个玻璃球勒前头闪闪发亮，自助餐个香味好像已经飘过来了……阿拉一边走一边勒勒听小敏子讲伊搭聚宝（爱人）为囡恩别墅院子里种了好多花……吾勒勒想，上海这么大，忙忙碌碌每一天，但好朋友约好个碰头，好像总归会让日脚突然之间亮起来。阿拉到了滨江大道2727号东方滨江大酒店，自助餐还没开始，餐厅工作人员请阿拉先到咖啡吧坐一歇……三位女同胞正好趁机去拍几张美美的照片。酒店大门口有一匹琉璃质感的大型飞马，晶莹剔透的，小敏子和靓妹开开心心地跑过去合影。（笑）看搿搭墙浪向一幅壁画，颜色搭靓妹毛衣蛮像呃，拍张照片看看，交关好看。喔唷！看伊拉两家头看壁画介认真介投入，吾干脆让伊拉两家头走进了壁画里厢。吾又请AI帮忙，拿照片做成了视频。喔唷！乖乖隆地咚！AI像煞晓得阿拉是来喫饭个，让画里厢两个人转过身跑了起来，好像一边跑一边讲：“喫饭、喫饭。”（笑）辰光过得蛮快，宅宅发来信息：“自助午餐开始咯。”
自助午餐，美食交关丰富，大家都喫得霞气开心。太阳照进餐厅，本来就已经喫得热气腾腾，太阳公公还要来“轧闹猛”，台子浪更加热火朝天了。（笑）看落地窗外阳光，照得锃锃亮。过歇出去散散步，大概会得暖洋洋伐。阿拉喫好饭，慢慢叫散步到陆家嘴地铁站，乘上2号线，到科技馆下来，从4号口出来，往右一转弯，世纪公园大门就出现勒眼门前。听宅宅讲过，公园里有油菜花。阿拉看了看导览图，没寻到油菜花个标记。小敏子讲：“格末阿拉自家去寻呀。”原来，阿拉本来想立勒湖边栏杆旁边拍两张照片，后来看到远处有礁石，勒勒湖里厢。等阿拉走过去一望，礁石浪厢有小朋友勒嗨白相。阿拉等小朋友回到岸浪厢，再立上礁石拍照片，开心得唻。（笑）小敏子正好看到旁边小朋友手浪有撩鱼虫个网，就对小朋友讲：“小朋友，谢谢侬，借吾用一歇歇噢（鱼网），吾也去撩一眼小蝌蚪。”小姑娘拿渔网递到小敏子手中。哇喔！小敏子模拟动作霞气优雅，一招一式像煞训练过一样……（笑）阿拉经过成片开花个树林，三家头侪搞勿清爽到底是桃花还是樱花，望来望去分也分勿清。🤣夕阳下山了，风里透出一点点凉意。搿个辰光，聚宝、伟明宅宅伊拉也寻过来了。大家拍好集体照，阿拉一天个欢乐相聚就搿能结束了。约好下趟再碰头哦！🔽前排从左至右：笔者、靓妹、小敏子，后排从左至右：宅宅、伟明、聚宝。吾搭宅宅回去个路浪，吾总归欢喜寻一寻月亮升起个地方（东南西北分勿清爽，看到月亮婆婆就晓得了）。哇喔，漂亮个月亮婆婆，正用一“叶”柳叶眉对牢阿拉张望……吾个亲朋好友搭新伙伴，侬也看看交，月亮婆婆真是好美好美呀！🌙✨️好朋友、新伙伴，今朝嘎三胡，打扰侬嘎多辰光，勿好意思，快点让眼睛休息一下吧，阿拉明朝会！
感谢侬看到此地❤️(^‿^)❤️
作者：芳儿
图片来源：芳儿
制作编辑：芳儿
20260521
夜雨聆风
